ரஹ்மான் தனது திருமணத்தை மீண்டும் நடத்திக்கொள்ள வேண்டும் - ஃபத்வா விதித்த முஸ்லீம் அமைப்பு

ஈரான் இயக்குனர் மஜீத் மஜிதி இயக்கிய, முகமத் - த மெசஞ்சர் ஆஃப் காட் திரைப்படத்துக்கு ஏ.ஆர்.ரஹ்மான் இசையமைத்திருந்தார்.

 

இந்தப் படம் வெளியாகி பாராட்டுகளை குவித்து வருகிறது. சர்வதேச திரைப்பட விழாக்களிலும் இப்படம் திரையிடப்படுகிறது.

 

இந்தப் படம் இஸ்லாத்துக்கு எதிரானது என்றுகூறி, படத்தை இயக்கிய மஜீத் மஜிதிக்கும், இசையமைத்த ரஹ்மானுக்கும் ஃபத்வா விதித்துள்ளது, மும்பையைச் சேர்ந்த சன்னி பிரிவு ரஸாக் அகதாமி என்ற அமைப்பு.

 

அவர்கள் விதித்துள்ள ஃபத்வாவில், முகமத் - த மெசஞ்சர் ஆஃப் காட் திரைப்படம் இஸ்லாத்தின் அடிப்படை கோட்பாடுகளுக்கு எதிரானது என கூறப்பட்டுள்ளது.

 

நபிகளின் வார்த்தைகள்தான் அனைத்தும். அவருக்கு உருவம் கிடையாது என்கிறது இஸ்லாம். அதற்கு எதிராக இந்தப் படம் உருவாக்கப்பட்டுள்ளது. இஸ்லாத்துக்கு எதிரான இந்தப் படத்தில் பணியாற்றியதன் மூலம், மஜீத் மஜிதிதியும், ரஹ்மானும் தெரிந்தே இஸ்லாத்தின் சட்டத்தை மீறியுள்ளனர். 

 

அவர்கள் மீண்டும் கல்மாவை படிக்க வேண்டும். தங்களின் திருமணத்தை மீண்டும் நடத்தி, தங்களை அவர்கள் புனிதப்படுத்திக் கொள்ள வேண்டும் என அந்த ஃபத்வாவில் மேலும் கூறப்பட்டுள்ளது.

 

ரஸாக் அகதாமி, இந்தப் படத்தை இந்தியாவில் தடைசெய்யுமாறு மராட்டிய மாநில முதல்வருக்கும், உள்துறை அமைச்சர் ராஜ்நாத் சிங்குக்கும் கடிதம் அனுப்பியுள்ளது.